செய்தித் தாள்களில்

A news from 30th Oct. Indian Express - Madurai print

இன்று அணு உலை எதிர்ப்பு நாள் இந்திய கம்யூ., (எம்.எல்) முடிவு

தினமலர் : அக்டோபர் 30,  திருநெல்வேலி பதிப்பு

திருநெல்வேலி : கூடன்குளம் அணு உலையை மூட வலியுறுத்தி இந்திய கம்யூ., (எம்.எல்) சார்பில் இன்று (30ம் தேதி) அணு உலை எதிர்ப்பு நாள் ஆர்ப்பாட்டம் நடத்தப்படுகிறது என்று மாநில செயலாளர் பாலசுந்தரம் தெரிவித்தார்.

இதுகுறித்து நெல்லையில் நேற்று நிருபர்களிடம் அவர் கூறியதாவது: கூடன்குளம் அணு உலையை மூடக் கோரி கூடன்குளம், இடிந்தகரை பகுதி மக்கள் தொடர் போராட்டங்களை நடத்தி வருகின்றனர். இப்போராட்டத்தை தீவிரப்படுத்தும் வகையில் இந்திய கம்யூ.,(எம்.எல்) சார்பில் இன்று (30ம் தேதி) மாநில அளவில் கூடன்குளம் அணு உலை எதிர்ப்பு நாள் நடத்தப்படுகிறது. கோவையில் நடக்கும் பொதுக்கூட்டத்தில் கட்சியின் அரசியல் தலைமை குழு உறுப்பினர் குமாரசாமி, அணு உலை எதிர்ப்பு போராட்ட கமிட்டி ஒருங்கிணைப்பாளர் உதயக்குமார் உட்பட பலர் கலந்து கொள்கின்றனர்.

நெல்லை ஜங்ஷன் ரயில்வே ஸ்டேஷன் முன் இன்று (30ம் தேதி) ஆர்ப்பாட்டம் நடக்கிறது. தொடர்ந்து 3 மாவட்டங்களை சேர்ந்த கட்சி நிர்வாகிகள் கூடன்குளத்திற்கு சென்று போராட்ட குழுவினரை சந்திக்கின்றனர். மேலும், சென்னை, சேலம், தஞ்சை உட்பட முக்கிய பகுதிகளிலும் போராட்டங்கள் நடத்தப்படுகிறது. 1988ம் ஆண்டு முதலே கூடன்குளம் அணு மின் நிலையத்திற்கு எதிராக தொடர்ந்து இந்திய கம்யூ., (எம்.எல்) போராடி வருகிறது. அணு உலையை மூடும் வரை தொடர்ந்து போராட்டம் நடத்தப்படும்.

மக்களின் உயிர் வாழ்வுரிமை, பாதுகாப்பு, எதிர்காலம் என்பதை விட மின்சாரம், தொழில் வளர்ச்சி, வெளிநாட்டு, உள்நாட்டு முதலீடு போன்வற்றிற்கு காங்., ஆட்சியில் முக்கியத்துவம் அளிக்கப்படுகிறது. தமிழகத்தில் அணு உலை தேவையில்லை என்று முதல்வர் ஜெயலலிதா இதுவரை கூறவில்லை. மக்கள் அச்சத்தை போக்கி கூடன்குளம் அணு மின் நிலையத்தை செயல்படுத்தலாம் என்று திமுக தலைவர் கருணாநிதி கூறுகிறார். ஜெய்தாபூர் அணு உலையை எதிர்க்கும் இடதுசாரி கட்சியினர் கூடன்குளத்திற்கு எதிர்ப்பு தெரிவிக்கவில்லை. எனவே, கூடன்குளத்திற்கு எதிராக அனைத்து தரப்பினரும் போராடி இந்த அணு உலையை மூட நடவடிக்கை எடுக்க வேண்டும். இவ்வாறு அவர் கூறினார். பேட்டியின் போது நிர்வாகிகள் சங்கரபாண்டியன், ரமேஷ், தேன்மொழி, கருப்பசாமி, கணேசன் மற்றும் பலர் உடனிருந்தனர்.